بالرغم من مرارة التعادل (الهزيمة )امام منتخب زامبيا الذي يلعب بلاعب واحد فقط لو احسن لاعبونا الكبار رقابته لشل منتخب زامبيا تماما ولكن يبدو ان هذا الاعب بالرغم من شعره الاصفر كان لا بس طاقية الاخفى فلا لاعبونا احسوا بيه و لا المعلم شحاته اشار اليه فقعد بيرطع فى الملعب فى كل الاتجاهات
لى بعض الملاحظات على المنتخب اثناء و بعد المبارة :
1- يبدو ان المعلم شحاته كان فاكر ان المبارة ملعوبة على استاد اولدترافود فى انجلترا علشان كده كان مغير الاتحاهات الشمال يمين و اليمين شمال
فاصبح الونجين بتوع مصر زى اللى رقصوا على السلم لااللى فوق و لا اللى تحت شافوهم لا و الطامة الكبرى ان المعلم هيمنع انضمام بركات للمنخب مع ان بركات مش هو اللى وظف نفسه فى غير مركزه !!!!!!!!!!!!!!!!!
2- كلنا شوفنا عمرو بيه ذكى و هو عايش فى دور رونالدو مع انه سنة اولى احتراف تلاقيه واخد الكورة مقاولة عابز يروح بيها بيته و يا سلام لو حد اداله كورة مش على هوا سيادته يقعد يبرطم و يلعن سلسفيل جدوده و هاتك تا تشويح فوق يا ممس انت لسه اسمك فى انجلترا مكتوب بالرصاص و اديك شوفت بين عشية و ضحاها
ستيف بروس قلب عليك ازاى بعد ان كنت فتاه المدلل يا جماعه هذا ما نعيب فيه على جوزيه و بنقول انه بيقلب على اللعيبة لاسباب شخصية ها هو بروس يبرئ جوزيه و يرصد لنا مفاهيم الاحتراف اللى يجيد المدرب يحطه فوق دماغه و اللى !!!! اهو الدكة تساع من الحبايب الف
3- انصح السادة المحترمين لاعبينا يغيروا نوع معسل التفاح اللى بيشربوه من تفاح عادى الى تفاح فاخر لان صحتهم اتهلكت من التفاح العادى و الفرق مش كتير قوى على جيوبهم العامرة و ياريت يضموا معاهم عمرو بيه ذكى الى رابطة " مدخنون بلا دم " لو مكنش عضو اساسا حتى يعلموه مبدئ مهم من ميادئ الشيشة
ان" الشيشة مناولة مش مقاولة" اهو يفتكروا وهو فى الملعب و يحن بكام كورة على عباد الله الغلابة اللى جنبه
4- المعلم حسن شحاته طبعا مش عايز اتقل عليك و اقولك انت فين من مشاكل اللعيبة طبعا الله يكون فى عونك انت مفرغ نفسك للجماعة بتوع اتصالات و ليبتون
و المصاطب الفضائية يبقى لاحول الله هتفضى لمنتخب مصر ازاى هتقطع نفسك يعنى ربنا يو فقك يا مان والى الامام دائما يابو على يا خفيف الدم
5- المدرب العالمى شحاته ( تانى ) لو مسألة الاتجاهات و اليمين و الشمال مش مظبطة معاك هاتلك كراسة رسم بيانى و انضم لمجموعات تقوية مع طلبة الاعدادية
علشان تعرف ان الجناح اليمين بيلعب فى اليمين اللى هو زى الايد اللى بناكل بيها
6- الله عليك يا متعب كنت جامد قوى ر يحت دماغك و مشيت ورا الحكمة اللى بتقول من يعمل كثيرا يخطئ كثيرا علشان كده يا راجل يا مسالم ريحتنا وريحت نفسك
و معملتش اى حاجة خالص فخرجت سيرتك عطرة كأنك لم تشترك فى المباراة او لم تأتى اساسا من السعودية
7- الاخ شوقى ( جحا حاليا ) يا ترى ايه نوع الجيل اللى انت ضاربه فى شعرك ؟؟ بس واضح يا كابتن انه مش مثبت للشعر بس لا مثبت للرجلين كمان فى الارض
علشان كده تلاقيك كنت بتلعب و لا اللى مربوط بحبل !!!!!! اه لو كنت سمعت كلام عمك مساء السبوبة و عدلت الزلموكة ؟؟؟
8- بطبخة : أن طلع العيب من أهل العيب مايبقاش عيب
كل هذه النقائص و عايزينا نشم المكسب ده حتى يبقى حرام ان ربنا يكافئنا على الاحقاد اللى بين قائدى هجوم و يجان اللى اتوقع فى الفترة المقبلة تفرغهما التام للردح و المناوشات عبر دكاكين الاعلام بتاعت السبوبة لحد ما يلاقو نفسهم هما الاتنين على قائمة انتقالات نادى و يجان بعد ما يجيب لعيبة عايزة تلعب بجد
الشهرة و الغيرة اعمت لاعبينا فكانت الضربة القاضية من الله ليذكرهم بانهم لم يحققوا اى نصر الا بقربهم منه و طاعتهم له
ورب ضارة نافعة فالتعادل فى البداية يمكن تفوق لا عبينا و تخليهم يتقوا الله و يكافئوا الشعب الغلبان اللى مش مقصر
و انا لمنتظرون و ان شاء الله خير
